Category: Լ

[live/լավ + մարդ] ուղիղ վիդեոեթերներով իր կյանքի ու գործունեության մասին հանրության հետ անվերապահորեն կիսվող մարդ։ Հասկացությունը ծնվել է թավշյա հեղափոխության արդյունքում ՀՀ վարչապետ ընտրված Նիկոլ Փաշինյանի կողմից ֆեյսբուքյան ուղիղ եթերներով (live մտնելով) թափանցիկ և հաշվետու աշխատելաոճի ցուցադրման նախադեպից։ ՆՓ-ի շնորհիվ լայվամարդ լինելն  իբրև հաղորդակցության միջոց դարձավ քաղտեխնոլոգիա ու եթե մինչ այդ վիդեո բլոգինգի (վլոգինգի) միջոցով իրապատումներ (ռեալիթի շոուներ) վարելու պրակտիկան  հիմնականում գոյություն ուներ շարքային մարդկանց և նրանց շարքային կենցաղավարության շրջանակներում, ապա հիմա այն դարձել է ուղիղ ժողովրդավարության գործիք՝ հավասարության նշան դնելով հետևորդի (ֆոլոուեր, սըբսքրայբեր), օգտատիրոջ (յուզեռ) և ընտրողի միջև։

Տես նաև՝ դբա լայվը, լայվություն, լայվամարտ, լայվագույն, լայվ էլի, Նիկոլի թիվ, Նիկոլ լայքաբեր,  նիկոլամոլություն

[like + քաքմեջ] Լայքմեջն այն անհարմար իրավիճակն է, երբ սոցիալական ցանցում քո հրապարակումը բոլորն անխտիր սրտում են, կամ հռհռուկ են դնում, իսկ մեկը մտնում ու չորով լայքամատի կամ լացուկացի զմայլիկի է այն արժանացնում՝ խախտելով մանրախնդիր, բայց հաճելի վիճակագրությունը։

Տես նաև՝ հաքմեջ

[локш – локш хамать, локш хлебать] սովետական քրեական ժարգոնից հայկական բանավոր խոսք ներթափանցած և հրաշալիորեն տեղայնացած արտահայտություն: Բնագրում նշանակում է անհեթեթ ու ձանձրալի պարապուրդ, անգործություն, որի հաղթահարման համար խոչընդոտում են արտաքին անհաղթահարելի հանգամանքները:

Սակայն հայոց մեջ լոքշը հասցվել է հոգևոր ինքնասուզման հայեցակարգի մակարդակի, որում հմտացած անհատը հասնում է մեդիտատիվ տրանսին հարող մի վիճակի, երբ իրոք, անկախ արտաքին հանգամանքներից, հաջողվում է ի սպառ սպանել սեփական օգտակար և նույնիսկ անօգուտ գործողության գործակիցն  ու անգամ տեղաշարժվելու ներքին մոտիվացան հասցնել զրոյի: Բայց քանի որ որոշ կենսագործունեությունից հրաժարվել ամեն դեպքում չի հաջողվում, լոքշակեցության սկսնակ ճգնավորները ձգտում են հասնել ապրելու 99% ճշտության սիմուլյացիայի: Առօրյա կյանքում անվարժ աչքը դժվար թե կարողանա տարբերել լոքշակյացին միջին վիճակագրական հայորդուց: Նրա հոգին պարուրած էքզիստենցյալ ապատիան ոչինչ չի մատնում, բացի ժամանակ առ ժամանակ ի խորոց սրտի արտաբերվող «իշ տարբերութուն», «մեկ ա բան չի փոխվելու», «իմմաստը» կարգի արտահայտությունները:

Ասում են, որ լոքշավորության ամենաբարձր մակարդակներում պայծառության հասածներին հաջողվում է քվանտային մակարդակում հաղորդակցվել տիեզերքի հիմնարար, մշտնջենական ձանձրույթին և տարրալուծվել նրա մեջ՝ դուրս պլստալով տառապալից ռեինկառնացիաների անվերջանալի շրջապտույտից:

[լրատվական + թվացյալ] լրաթվականը թվացյալ լրատվական կայք է, սոցիալական ցանցերում էջ, որ կեղծ-գրավիչ վերնագրերի, ֆոտոների ու տեսանյութերի միջոցով այցելությունների, դիտումների ու լայքերի քանակություն է գեներացնում:

Լրաթվականների կողմից օգտագործվող վերնագրերը հիմնականում կառուցվում են այսպիսի մոդելային բաղադրիչներով՝ «շտապ», «սենսացիոն», «անհավատալի է, բայց..», «այն, ինչ տեղի ունեցավ հետո, պարզապես ցնցող էր…»:

Քիչ թե շատ գրագետ օգտատերը պետք է կարողանա տարբերել տեղեկատվության նմանակումը տեղեկատվությունից, եթե իհարկե առհասարակ դա հնարավոր է անել ժամանակակից աշխարհում:

Տես նաև՝ լայքահավաք, լրագող, լռագրող

[լայք + հավաքել] ֆեյսբուքահայ համայնքի կողմից շահադիտական նպատակներով հղումների, նկարների կամ այլ հրապարակումների վրա լայքեր և կիսումներ ստանալու մեթոդների ամբողջություն: Օգտագործվում է հիմնականում նորաբույծ լրաթվական կայքերի, պարապ տնային տնտեսուհիների, գրավաճառների և այլքի կողմից: Եթե լայքեր կորզելու համար տնային տնտեսուհիներն օգտագործում են խղճահարության մեթոդը՝ «խնդրում եմ էլի, մեր երեխան մասնակցում է դեղին ճուտիկ մրցույթին և մեզ հինգ լայք է պակասում այս փչովի ոչխարիկը շահելու համար», ապա լրաթվականներն ավելի անմարդկային մեթոդների են ընդունակ, օրինակ՝ «շտապ, սահմանամերձ գոտում տաս զինվոր է զոհվել» վերնագրով հղումներ տարածելով, երբ բացում ես, պարզվում է, որ խոսքը Սոմալիի մասին է:

 Տես նաև՝ շտապ՝ արածել, լայքարշավ, լայքմեջ, լայքատվություն, լայքամուրհակ

Կիրառության օրինակներ՝

• Միանում ենք ավանդական դարձող գրքային լայքահավաքին:
• «Հայկական Ֆեյսբուքի չտեսության ամենադասական դրսևորումը` լայքահավաք»:
• «Միացե՛ք ՖԲիսետկային, Arm View-ն երբեք լայքահավաք խնդրանքով հանդես չի գալիս։, բայց սա ուրիշ դեպք է։»

[լրագրող + գող] լրագողություն իրականացնող անձ, ով օպերատիվ կարգով ընթացիկ լրահոսում հայտնված որևէ տեղեկատվություն իր անունից վերահրատարակում է սեփական զանգվածային լրատվամիջոցում կամ սոցիալական ցանցի հարթակում առանց տեղեկատվության աղբյուրին հղում անելու։ Կարող է լինել ինչպես ուղղակի արտատպման, այնպես էլ վերափաթեթավորման տեսքով։

Լրագողությունը գրագողության տարատեսակ է։

Տես նաև՝ լռագրող