Category: Հ

[հակամարտություն + անմարդկային] մարդկության և մարդկայինության դեմ ուղղված ծանր հանցագործություններով ուղղորդվող հակամարտություն, ռազմական կոնֆլիկտ, պատերազմ։

[հայի + գեն] պսեվդոգիտական, ռազմահայրենասիրական եզր, որով ինքնամոռաց հայրենասերները հիմնավորում են հայ ազգի որևէ ներկայացուցչի ձեռքբերումներն ու բարոյական նկարագիրը՝ ուղղակիորեն այն վերացարկելով տվյալ մարդու անձնական որակներից և կապելով հայկական ծագման հետ՝ այսպիսով «հայկական գեներին» վերագրելով մոգական ելային տվյալներ կրելու հատկություն։

Վերջին շրջանում հայուգենն օգտագործվում է ավելի շատ հեգնական իմաստով՝ հայկական ծագումնաբանությունը և թերուս նորազգայնականությունը ծաղրելու համար։

Տես նաև՝ հայի տեսակ, դանդուռգեն

[հանրապետական + տականք] վաղ ստալինիզմից մինչ ուշ ուլտրալիբերալիզմ՝ ցանկացած քաղաքատնտեսական ռեժիմում նախանձելի կենսունակություն ցուցաբերող միաբջիջ վարչարարական մակաբույծների դաս, որոնց հայկական լեռնաշխարհում տեղայնացած աբորիգեն տեսակը մասնագիտական գրականության մեջ կոչվում է republicanus armenicus կամ հանրապետականք հայոց: Մակաբույծների այս դասն առհասարակ առանձնանում է պետական և մերձպետական համակարգերը սնող ֆինանսատար անոթներին սերտաճելու և լուսավոր ապագայի համար ներդրվող բոլոր ջանքերը անխնա արտածծելու հատկությամբ: Քանի որ մակաբույծներն ընդհանուր առմամբ օտար մարմիններ են, ապա համաժողովրդական իմունային համակարգին մոլորության մեջ դնելու համար իհայտ է եկել republicanus armenicus pseudointellectum առավել մոդիֆիկացված տարատեսակը, որ ինտելեկտուալ գործունեության նմանակման մեծ վարպետություն է ցուցաբերում, մշակում գաղափարախոսական համակարգ, անգամ խաղում «что, где, когда» և շախմատ:   Այս տարատեսակի սելեկտիվ վերարտադրության հիմնական օջախները բուհերի ուսանողական խորհուրդներն են, այս փուլում մակաբույծի թրթուռը կոչվում է prerepublicanus saqulicum: 

Իրենց զավթած տեղերում համակարգի բարիքների հաշվին պարարտացած հանարապետականքներից շատերը զարմանալիորեն լայն ժողովրդականություն են վայելում՝ իբրև հանրապետքական սուբյեկտներ` կոռուպցիոն փոխշահավետ փոխգործակցության մեջ ներքաշելով և հանցակից դարձնելով նաև իրենցպիսին չհանդիսացող առանձնյակներին և համակարգերին: Սա արդեն լուրջ հայտ է էվոլյուցիային, որովհետև ողջ համակարգը ախտահարելու և ամեն ինչ իրենց վերարտադրությանն ի սպաս դնելու այսպիսի բարձրակարգ վարքագծի չի հասել անգամ անգերազանցելի մակաբույծ համարվող Acari արնախում տզերի ենթախումբը:

Տես նաև՝ հանրապետքարան

[հեռու + շեն] հայկական լեռնաշխարհի անմատույց, քաղաքակրթության համար անհաս հեռուներում գտնվող հիպոթետիկ հայկական բնակավայր, ուր չեն հասնում հեռուստա և ռադիո ալիքները, չկա ինտերնետ, գիտելիքներ մարդու իրավունքների և հիմնարար ազատութունների մասին, տեղյակ չեն Արիստոտելեսի և Պլատոնի ոչ միայն հիմնական աշխատությունների, այլ նաև հավանական գոյության մասին, «հոմովս» կամ «ուտեմ քեզ» արտահայտությունները ընկալվում են ուղիղ իմաստով, աղոթքներն ու անեծքները կարողանում են հակազդել գրավիտացիոն դաշտին և այլն:

Քանի որ Հեռվաշենը չի տեղայնացվել GPS համակարգի կողմից, ենթադրաբար այն վերգիտակցական կեցավայր է ու ձեզ հետ, ձեր կողքին ապրողներից շատերի հեռվաշենցի լինելը կարող եք բացահայտել նրանց և իրականության միջև առկա տարածաժամանակային խզումը մատնող տարօրինակ վարքագծից:

Քվանտային մեխանիկայի՝ զուգահեռ իրականությունների գոյության հիպոթեզի ջատագովները հաճախ են հղում անում հեռվաշենի առկայությանը, իրենց տեսությունը հիմնավորելու համար:

[Օրինաց/հորինած + երկիր] Օրինաց Երկիր կուսակցության այլընտրանքային ժողովրդական անվանումն է: Ընդգծում է այդ կառույցի գաղափարական սնանկությունն ու քաղաքական անգործունակությունը: Պսեվդոընդդիմադիրից իշխանահաճո քաղաքական ուժի դիրքեր և հակառակը կատարած բազմակի սահուն անցումներից հետ, կազմակերպությունը 2015թ վերափաթեթավորվեց նոր՝ Հայկական վերածնունդ անվան տակ:

Օգտագործման օրինակներ՝

• Բնությունը պատահական չի ստեղծել սեքսը՝ երկուսի միավորումը կարևոր նշանակություն ունի առողջ գեների փոխանակման տեսանկյունից, իսկ այ ինքն իր հետ միավորվող տեսակը դատապարտված է, ինպես Հայկական վերածնունդ միավորում անվան տակ ինքն իր հետ միավորվող Հորինած երկիր կուսակցությունը:

[հուսախաբ + փաբ] 2013-2018 թվականներին Երևանի կենտրոնական փողոցների կիսանկուղներից մեկում սեփական փաբ ունենալու հիփստերահայի երազանքից ծնված, բայց գոյատևման ոչ մի շանս չունեցող մանր ձեռներեցություն, որը փոխարինելու եկավ տաքսի սերվիսների և հացի փռերի 2000-ակնների և կոմիսիոն ստոլիկների 90-ականների տենդին կամ տռենդին:

Տես նաև՝ թրաշամանուկ

[հոռի + ոռի] վատ, շատ վատ, ավելի վատ քան կարելի էր երևակայել: Վերջերս ավելի ու ավելի հաճախ է սկսել օգտագործվել ֆեյսբուքահայերենում, քանի որ անթաքույց հղում ունի վատթարագույնի մեկ այլ հոմանիշ՝ ոռի ածականին:

Օգտագործման օրինակներ

• Հայտնի մարդիկ ընթերցում են BlogNews-ում իրենց մասին գրված չար, անսիրտ, հոռի քոմենթները…

Տես նաև՝ թոռնո

[հետև + մուտք] ծառայողական պարտականություններից դուրս վերադասին կամ այլ իշխանություն ունեցող անձին շահադիտական նպատակներով շողոքորթելը, քծնելը, ծառայություններ մատուցելը: Ժողովրդական բանավոր խոսքում տարածված է հետամուտի «ոռ մտնել» համարժեքը: Նոր ժամանակներում ոչ ավանդական սեռական կողմնորոշում ունեցող անձանց կողմից կարող է ընկալվել իբրև հոմոֆոբ արտահայտություն:

Սովորաբար նորանշանակ բարձարտիճան պաշտոնյաներին աշխատանքային պարտականությունների 100-օրյա ժամկետը լրանալուն պես ընդունված է շնորհավորել նորամուտի առթիվ։

Սովետական Հայաստանից գաղջահայաստանին ժառանգված հետամտության ավանդույթը վերաձևակերպվելով նեոազգայնական նժդեհահաճո և կնամեծար փաթեթավորումներով բարեհաջող գոյատևեց մինչև Նիկոլի թիվ, երբ այն վերջապես հռչակվեց հետամնացություն։

Տես նաև՝ կրթօճառ, մտավոռական, հետամուխ, հետամուղ, հետամրմուռ

[հանցանք + հացադուլ] Ընտրություններից առաջ գործող քաղաքական գործչի ընդգծված բարեպաշտական կեցվածքը՝ ընտրազանգվածի համակրանքը վերանվաճելու ակնկալիքով:

Տես նաև՝ կարճաթև հիշողություն

Տես նաև՝ հրապարապախոսություն